Monday 21st of January 2019

പരശുവയ്ക്കല്‍ വില്ലേജ് ഓഫീസ് സ്മാര്‍ട്ടാകുന്നു

Category: Thiruvananthapuram
Published: Monday, 21 January 2019
 
തിരുവനന്തപുരം: നെയ്യാറ്റിന്‍കര താലൂക്കിലെ ആദ്യ സ്മാര്‍ട്ട് വില്ലേജ് ഓഫീസ് പരശുവയ്ക്കലില്‍ യാഥാര്‍ത്ഥ്യമാകുന്നു. കെട്ടിടത്തിന്റെ ശിലാസ്ഥാപനം ജനുവരി 23 ന് രാവിലെ 10ന് നടക്കും. സി.കെ.ഹരീന്ദ്രന്‍ എം.എല്‍.എ ചടങ്ങ് ഉദ്ഘാടനം ചെയ്യും. ജില്ലാ കളക്ടര്‍ ഡോ. കെ. വാസുകി വിശിഷ്ടാതിഥിയാകും.
 
44 ലക്ഷം രൂപ ചെലവഴിച്ചാണ് കെട്ടിടം നിര്‍മിക്കുന്നത്. സംസ്ഥാന സര്‍ക്കാരിന്റെ സ്മാര്‍ട്ട് വില്ലേജ് ഓഫീസ് പദ്ധതിയില്‍ പാറശ്ശാല നിയോജക മണ്ഡലത്തില്‍ നിന്നും പരശുവയ്ക്കല്‍ വില്ലേജ് ഓഫീസിനെയാണ് ഉള്‍പ്പെടുത്തിയത്. ഇതോടെ സ്വന്തമായൊരു വില്ലേജ് ഓഫീസ് കെട്ടിടം വേണമെന്ന പരശുവയ്ക്കല്‍ ഗ്രാമവാസികളുടെ ഏറെക്കാലത്തെ ആവശ്യം യാഥാര്‍ത്ഥ്യമാവുകയാണ്. 
 
പാറശ്ശാല നിയോജക മണ്ഡലത്തിലെ മറ്റ് വില്ലേജ് ഓഫീസുകളെക്കൂടി സ്മാര്‍ട്ട് വില്ലേജ് ഓഫീസ് പദ്ധതിയില്‍ ഉള്‍പ്പെടുത്തി നവീകരിക്കുന്നതിനുള്ള നടപടികള്‍ സ്വീകരിച്ചു വരുന്നതായി സി. കെ.ഹരീന്ദ്രന്‍ എം.എല്‍.എ പറഞ്ഞു. സ്മാര്‍ട്ട് വില്ലേജ് ഓഫീസില്‍ ജീവനക്കാര്‍ക്ക് പ്രത്യേക ക്യാബിന്‍ സംവിധാനത്തോടൊപ്പം അതിവേഗം സേവനങ്ങള്‍ ലഭ്യമാക്കുന്നതിനുള്ള ക്രമീകരണങ്ങള്‍ ഉണ്ടാകുമെന്നും അദ്ദേഹം പറഞ്ഞു.