Friday 21st of July 2017

ചരിത്രമെഴുതിയ ഇന്ത്യയ്ക്ക് ഏഷ്യന്‍ ചാമ്പ്യന്‍ഷിപ്പ്

Category: Sports
Published: Monday, 10 July 2017
ഭുവനേശ്വര്‍: ചരിത്രമെഴുതി ഏഷ്യന്‍ അത്‌ലറ്റിക്‌സില്‍ ഇന്ത്യ ചാമ്പ്യന്‍മാര്‍. മീറ്റിന്റെ 17 വര്‍ഷത്തെ ചരിത്രത്തിലാധ്യമായാണ് ഇന്ത്യ ചാമ്പ്യന്‍മാരാകുന്നത്. അതും 12 സ്വര്‍ണമുള്‍പ്പെടെ 29 മെഡലുകളുമായി. ഇതും ഇന്ത്യയുടെ എക്കാലത്തേയും മികച്ച നേട്ടമാണ്. 1985 മുതല്‍ ചാമ്പ്യന്‍മാരായ ചൈന ഇക്കുറി രണ്ടാമതായി. കസാക്കിസ്ഥാനാണ് മൂന്നാം സ്ഥാനത്ത്. 
ആകെ 12 സ്വര്‍ണവും അഞ്ചു വെള്ളിയും 12 വെങ്കലവും ഉള്‍പ്പെടെ 29 മെഡലുകള്‍ ഇന്ത്യ നേടിയെടുത്തു. മലയാളിതാരങ്ങുടെ മിന്നുന്ന പ്രകടനം കരുത്തായി. ആകെ 13 മെഡല്‍ ഇനങ്ങളില്‍ മലയാളിസാന്നിധ്യമുണ്ടായി. 1985ല്‍ ജക്കാര്‍ത്തയില്‍ നേടിയ 23 മെഡല്‍ നേട്ടത്തെ മറികടന്നു. അന്ന് 10 സ്വര്‍ണമാണ് ഇന്ത്യന്‍ നേടിയത്. വുഹാനില്‍ നടന്ന കഴിഞ്ഞ പതിപ്പില്‍ നാലു സ്വര്‍ണമുള്‍പ്പെടെ 13 മെഡലുമായി മൂന്നാമതായിരുന്നു ഇന്ത്യ.
അവസാനദിനം അഞ്ചു സ്വര്‍ണവും ഒരു വെള്ളിയും മൂന്നു വെങ്കലവും ഇന്ത്യ കലിംഗ സ്റ്റേഡിയത്തില്‍ കൊയ്തു. ഇതില്‍ കൌമാരതാരം നീരജ് ചോപ്ര റെക്കോഡ് പ്രകടത്തോടെ തിളങ്ങിനിന്നു. 85.23 മീറ്ററിലാണ് ഈ പത്തൊമ്പതുകാരന്‍ ജാവലിന്‍ എറിഞ്ഞത്. 2011ല്‍ ജപ്പാന്റെ മുകറാമി കുറിച്ച 83.27ന്റെ ചാമ്പ്യന്‍ഷിപ് റെക്കോഡ് നീരജ് ഭേദിച്ചു. പുരുഷന്‍മാരുടെ 10000 മീറ്ററില്‍ ജി ലക്ഷ്മണന്‍ ഇന്ത്യക്കായി സ്വര്‍ണംനേടി. മീറ്റില്‍ ലക്ഷ്മണിന്റെ രണ്ടാമത്തെ സ്വര്‍ണമായിരുന്നു. മലയാളിതാരം ടി ഗോപിക്കാണ് വെള്ളി. ഹെപ്റ്റാത്തലണില്‍ സപ്നാ ബര്‍മനും സ്വര്‍ണമണിഞ്ഞു. 4400 മീറ്റര്‍ റിലേയില്‍ മലയാളിതാരങ്ങളായ കുഞ്ഞുമുഹമ്മദ്, മുഹമ്മദ് അനസ്, അമോജ് ജേക്കബ് എന്നിവരും ആരോക്യ രാജീവും ഉള്‍പ്പെട്ട ടീം സ്വര്‍ണംനേടി.
മലയാളിതാരം ജിസ്‌ന മാത്യു, ദേബശ്രീ മജുംദാര്‍, എം ആര്‍ പൂവമ്മ, നിര്‍മല എന്നിവരുള്‍പ്പെട്ട ടീമും ഒന്നാമതെത്തി. പുരുഷ 800ല്‍ മലയാളിതാരം ജിന്‍സണ്‍ ജോണ്‍സണ്‍ വെങ്കലം സ്വന്തമാക്കി.