മൂന്ന് ആശുപത്രികള്ക്ക് കൂടി ദേശീയ ഗുണനിലവാര അംഗീകാരം
124 സര്ക്കാര് ആശുപത്രികള് ദേശീയ ഗുണനിലവാരത്തില്
തിരുവനന്തപുരം : സംസ്ഥാനത്തെ മൂന്ന് സര്ക്കാര് ആശുപത്രികള്ക്ക് കൂടി നാഷണല് ക്വാളിറ്റി അഷ്വറന്സ് സ്റ്റാന്റേര്ഡ് (എന്.ക്യൂ.എ.എസ്) അംഗീകാരം ലഭിച്ചതായി ആരോഗ്യ വകുപ്പ് മന്ത്രി വീണാ ജോര്ജ് അറിയിച്ചു. തിരുവനന്തപുരം കാട്ടാക്കട ന്യൂ ആമച്ചല് കുടുംബാരോഗ്യ കേന്ദ്രം (സ്കോര് 96.4%), കൊല്ലം ഉളിയക്കോവില് അര്ബന് പ്രൈമറി ഹെല്ത്ത് സെന്റര് (സ്കോര് 93.5%), വയനാട് മുണ്ടേരി കല്പറ്റ അര്ബന് പ്രൈമറി ഹെല്ത്ത് സെന്റര് (സ്കോര് 91.92%) എന്നിവയ്ക്കാണ് ഇപ്പോള് ദേശീയ ഗുണനിലവാര അംഗീകാരമായ എന്.ക്യൂ.എ.എസ് ബഹുമതി ലഭിച്ചതെന്ന് മന്ത്രി വ്യക്തമാക്കി.
ഇതോടെ സംസ്ഥാനത്ത് ആകെ 124 ആരോഗ്യ സ്ഥാപനങ്ങള്ക്ക് എന്.ക്യു.എ.എസ്. അംഗീകാരം ലഭിച്ചു. മൂന്ന് ജില്ലാ ആശുപത്രികള്, നാല് താലൂക്ക് ആശുപത്രികള്, ഏഴ് സാമൂഹികാരോഗ്യ കേന്ദ്രങ്ങള്, 32 അര്ബന് പ്രൈമറി ഹെല്ത്ത് സെന്റര്, 78 കുടുംബാരോഗ്യ കേന്ദ്രങ്ങള് എന്നിവയ്ക്ക് എന്.ക്യു.എ.എസ് അംഗീകാരം ലഭിച്ചിട്ടുണ്ട്.
രാജ്യത്തെ മികച്ച പ്രാഥമികാരോഗ്യ കേന്ദ്രങ്ങളുടെ വിഭാഗത്തില് ആദ്യത്തെ 12 സ്ഥാനവും കേരളം നിലനിര്ത്തുന്നു. സര്വീസ് പ്രൊവിഷന്, പേഷ്യന്റ് റൈറ്റ്, ഇന്പുട്സ്, സപ്പോര്ട്ടീവ് സര്വീസസ്, ക്ലിനിക്കല് സര്വീസസ്, ഇന്ഫെക്ഷന് കണ്ട്രോള്, ക്വാളിറ്റി മാനേജ്മെന്റ്, ഔട്ട് കം എന്നീ എട്ടു വിഭാഗങ്ങളായി 6500 ഓളം ചെക്ക് പോയിന്റുകള് വിലയിരുത്തിയാണ് എന്.ക്യു.എ.എസ് അംഗീകാരം നല്കുന്നത്. എന്.ക്യു.എ.എസ് അംഗീകാരത്തിന് മൂന്നു വര്ഷകാലാവധിയാണുളളത്. എന്.ക്യു.എ.എസ് അംഗീകാരം ലഭിക്കുന്ന പി.എച്ച്.സി.കള്ക്ക് രണ്ടു ലക്ഷം രൂപ വീതവും മറ്റ് ആശുപത്രികള്ക്ക് ഒരു കിടക്കയ്ക്ക് 10,000 രൂപ എന്ന നിലയിലും വാര്ഷിക ഇന്സന്റീവ് ലഭിക്കും.