കൊറോണ വൈറസ്: പ്രതിരോധ പ്രവര്‍ത്തനങ്ങള്‍ ത്വരിതപ്പെടുത്തി
കൊല്ലം : ജില്ലയില്‍ കൊറോണ വൈറസ് ബാധയുടെ പ്രതിരോധ പ്രവര്‍ത്തനങ്ങള്‍ ത്വരിതപ്പെടുത്തിയതായി ജില്ലാ മെഡിക്കല്‍ ഓഫീസര്‍ ഡോ വി വി ഷേര്‍ലി അറിയിച്ചു. ജില്ലയില്‍ നിന്ന് പരിശോധനയ്ക്ക് അയച്ച 15 സാമ്പിളുകളുടെ പരിശോധനാഫലം നെഗറ്റീവ് ആണെന്ന് സ്ഥിരീകരിച്ചു. ആയതിനാല്‍ ജനങ്ങള്‍ പരിഭ്രാന്തരാകരുതെന്നും മറിച്ച് അതീവ ജാഗ്രത പാലിക്കണമെന്നും ഡി എം ഒ അറിയിച്ചു. 211 പേര് നിലവില്‍ നിരീക്ഷണത്തിലാണ്.
ഡി എം ഒ യുടെ നേതൃത്വത്തില്‍ രൂപീകരിച്ച 15 ടീമുകള്‍ എല്ലാ ദിവസവും സ്ഥിതിഗതികള്‍ വിലയിരുത്തുകയും പ്രവര്‍ത്തനങ്ങളെ ഏകോപിപ്പിക്കുകയും ചെയ്തുവരുന്നു. ജില്ലാതലത്തില്‍ വിവിധ ആരോഗ്യആരോഗ്യഇതര സര്‍ക്കാര്‍ വകുപ്പുകള്‍, നഴ്‌സിംഗ് സ്‌കൂള്‍, സ്വകാര്യ ആശുപത്രികള്‍ എന്നിവിടങ്ങളിലെ ജീവനക്കാര്‍ക്ക് കൊറോണ വൈറസ് ബാധയുമായി ബന്ധപ്പെട്ട പരിശീലനം നല്‍കി കഴിഞ്ഞു. പഞ്ചായത്ത്, മുനിസിപ്പാലിറ്റി, വാര്‍ഡ്തല പരിശീലനങ്ങള്‍ വരുംദിവസങ്ങളില്‍ നടക്കും.
ചൈനയില്‍ നിന്ന് ജില്ലയില്‍ എത്തിയവരില്‍ ഇനിയും ആരോഗ്യ വകുപ്പിന്റെ കണ്‍ട്രോള്‍ റൂമില്‍ പേര് വിവരങ്ങള്‍ രേഖപ്പെടുത്താത്തവര്‍ ഉണ്ടെങ്കില്‍ അവര്‍ എത്രയുംവേഗം റിപ്പോര്‍ട്ട് ചെയ്യണം. 24 മണിക്കൂറും പ്രവര്‍ത്തിക്കുന്ന കണ്‍ട്രോള്‍ റൂം ജില്ലാ മെഡിക്കല്‍ ആഫീസില്‍ പ്രവര്‍ത്തനം ആരംഭിച്ചിട്ടുണ്ട്.
കണ്‍ട്രോള്‍ റൂം നമ്പര്‍: 8589015556, 7306750040, 04742794004
