വടക്കന് കേരളത്തില് ചക്രവാതചുഴി; ഇടി -മിന്നൽ മഴയ്ക്ക് സാധ്യത
![post](/newsimages/1/r_1716355517.jpg)
വടക്കന് കേരളത്തിന് മുകളിലായി ചക്രവാതചുഴി നിലനില്ക്കുന്നതിനാല് കേരളത്തില് അടുത്ത അഞ്ച് ദിവസം ഇടി / മിന്നല് / കാറ്റ് ( 49-50 km/hr) കൂടിയ മഴയ്ക്ക് സാധ്യത. ഒറ്റപെട്ട സ്ഥലങ്ങളില് മെയ് 22, 23 തീയതികളില് അതിതീവ്രമായ മഴയ്ക്കും, മെയ് 22 മുതല് മെയ് 24 വരെ ഒറ്റപെട്ട സ്ഥലങ്ങളില് അതിശക്തമായ മഴയ്ക്കും, മെയ് 22 മുതല് മെയ് 25 വരെ ശക്തമായ മഴയ്ക്കും സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിക്കുന്നു.
തെക്ക് പടിഞ്ഞാറന് ബംഗാള് ഉള്ക്കടലില് തമിഴ്നാട് ആന്ധ്രാ തീരത്തിനു അകലെയായി ന്യുനമര്ദ്ദം ( Low Pressure Area ) രൂപപ്പെട്ടു. വടക്ക് കിഴക്ക് ദിശയില് സഞ്ചരിക്കുന്ന ന്യുനമര്ദ്ദം മെയ് 24 രാവിലെയോടെ മധ്യ ബംഗാള് ഉള്ക്കടലില് തീവ്ര ന്യുനമര്ദ്ദമായി (Depression ) ശക്തി പ്രാപിക്കാന് സാധ്യത. തുടര്ന്ന് വടക്കു കിഴക്കു ദിശയില് സഞ്ചരിച്ചു വീണ്ടും ശക്തി പ്രാപിച്ചേക്കുമെന്ന് കേന്ദ്ര കാലാവസ്ഥ വകുപ്പ്.