സംസ്ഥാനത്ത് എട്ട് പേര്ക്ക് കൂടി കോവിഡ് 19 സ്ഥിരീകരിച്ചു; ആറ് പേര് രോഗമുക്തി നേടി
* 1,58,617 പേര് നിരീക്ഷണത്തില്
തിരുവനന്തപുരം : കേരളത്തില് എട്ട് പേര്ക്ക് കൂടി കോവിഡ് 19 സ്ഥിരീകരിച്ചതായി ആരോഗ്യ മന്ത്രി കെ.കെ. ശൈലജ ടീച്ചര് അറിയിച്ചു. കോഴിക്കോട് ജില്ലയില് 5 പേര്ക്കും പത്തനംതിട്ട, കണ്ണൂര്, കാസര്ഗോഡ് ജില്ലകളില് ഓരോരുത്തര്ക്കുമാണ് രോഗം സ്ഥിരികരിച്ചത്. കോഴിക്കോട് ജില്ലയില് രോഗം ബാധിച്ചവരില് 4 പേര് നിസാമുദ്ദീനില് നിന്നും ഒരാള് ദുബായില് നിന്നാണെത്തിയത്. പത്തനംതിട്ടയില് രോഗം സ്ഥിരീകരിച്ചയാള് ഡല്ഹിയില് നിന്നും വന്നതാണ്. കണ്ണൂര്, കാസര്ഗോഡ് ജില്ലയിലുള്ളവര്ക്ക് രോഗം ബാധിച്ചത് സമ്പര്ക്കത്തിലൂടെയാണ്. ഇതുവരെ നിസാമുദ്ദീനില് നിന്നും വന്ന 10 പേര്ക്കാണ് രോഗം സ്ഥിരീകരിച്ചത്.
കേരളത്തില് 314 പേര്ക്കാണ് ഇതുവരെ രോഗബാധ സ്ഥിരീകരിച്ചത്. 6 പേരുടെ പരിശോധനാ ഫലം ഞായറാഴ്ച നെഗറ്റീവ് ആയി. കണ്ണൂര് ജില്ലയില് 4 പേരുടെയും തിരുവനന്തപുരം (മലപ്പുറം സ്വദേശി), കോഴിക്കോട് ജില്ലകളില് ഓരോരുത്തരുടേയും പരിശോധനാ ഫലമാണ് നെഗറ്റീവ് ആയത്. നിലവില് 256 പേര് വിവിധ ആശുപത്രികളില് ചികിത്സയിലാണ്. ഇതുവരെ ആകെ 56 പേര് രോഗമുക്തി നേടി.
സംസ്ഥാനത്തെ വിവിധ ജില്ലകളിലായി 1,58,617 പേര് നിരീക്ഷണത്തിലാണ്. ഇവരില് 1,57,841 പേര് വീടുകളിലും 776 പേര് ആശുപത്രികളിലുമാണ്. 188 പേരെയാണ് ഞായറാഴ്ച ആശുപത്രിയില് പ്രവേശിപ്പിച്ചത്. രോഗലക്ഷണങ്ങള് ഉള്ള 10,221 വ്യക്തികളുടെ സാമ്പിള് പരിശോധനയ്ക്ക് അയച്ചു. ഇതില് ലഭ്യമായ 9,300 സാമ്പിളുകളുടെ പരിശോധനാ ഫലം നെഗറ്റീവ് ആണ്.