സൂര്യഗ്രഹണം: ശബരിമല തിരുനട നാല് മണിക്കൂര് അടച്ചിടും
ദര്ശനത്തിന് നിയന്ത്രണമുണ്ടാകും
പത്തനംതിട്ട: സൂര്യഗ്രഹണത്തോടനുബന്ധിച്ച് ഡിസംബര് 26ന് ശബരിമല ശ്രീ ധര്മ്മശാസ്താ ക്ഷേത്രനട നാല് മണിക്കൂര് അടച്ചിടും. രാവിലെ 7.30 മുതല് 11.30 വരെയാണ് നട അടച്ചിടുക. മാളികപ്പുറം, പമ്പ തുടങ്ങിയ ക്ഷേത്രങ്ങളിലും സമയക്രമം ബാധകമായിരിക്കും. അയ്യപ്പഭക്തര്ക്ക് ദര്ശനത്തിന് നിയന്ത്രണമുണ്ടാകുമെന്ന് പോലീസ് അറിയിച്ചു.
പുലര്ച്ചെ മൂന്ന് മണിക്ക് ക്ഷേത്രനട തുറന്ന് നിര്മ്മാല്യ ദര്ശനവും അഭിഷേകവും കഴിഞ്ഞാല് 3.15 മുതല് 6.45 വരെ നെയ്യഭിഷേകം നടക്കും. ശേഷം ഉഷപൂജ കഴിച്ച് 7.30ന് നട അടയ്ക്കും. രാവിലെ 8.06 മുതല് 11.13 മണി വരെയാണ് സൂര്യഗ്രഹണം. ഗ്രഹണം കഴിഞ്ഞ് 11.30ന് നട തുറക്കും. തുടര്ന്ന് പുണ്യാഹവും കലശാഭിഷേകവും നടക്കും. ഇതിനുശേഷം ഒരു മണിക്കൂര് സമയം നെയ്യഭിഷേകം ഉണ്ടായിരിക്കും. കളഭകലശം എഴുന്നെള്ളത്തിന് ശേഷം കളഭാഭിഷേകം. തുടര്ന്ന് ഉച്ചപൂജ. അത് കഴിഞ്ഞ് നട അടയ്ക്കും.
മാളികപ്പുറം, പമ്പ തുടങ്ങിയ ക്ഷേത്രങ്ങളിലും രാവിലെ 7.30 മുതല് 11.30 വരെ നട അടച്ചിടും. അന്നേ ദിവസം വൈകുന്നേരം ശ്രീകോവില് നട തുറക്കുന്നത് അഞ്ച് മണിക്കായിരിക്കും. 5.30 ഓടെ തങ്ക അങ്കി സ്വീകരിക്കാന് നിയോഗിക്കപ്പെട്ടവര് തിരുനടയില് എത്തി പ്രത്യേക ഹാരം അണിഞ്ഞ് ശരംകുത്തിയിലേക്ക് യാത്ര തിരിക്കും. ആറ് മണിയോടെ തങ്ക അങ്കി ഘോഷയാത്രയ്ക്ക് ശരംകുത്തിയില് വച്ച് ആചാരപൂര്വ്വമുള്ള സ്വീകരണം നല്കും. തുടര്ന്ന് ക്ഷേത്രത്തിലേക്ക് ആനയിക്കും. 6.25 ഓടെ പതിനെട്ടാം പടി കയറി കൊണ്ടുവരുന്ന തങ്ക അങ്കിപ്പെട്ടി ശ്രീകോവിലിലേക്ക് ക്ഷേത്ര തന്ത്രിയും മേല്ശാന്തിയും ചേര്ന്ന് ഏറ്റുവാങ്ങും. ശേഷം തങ്ക അങ്കി ചാര്ത്തിയുള്ള മഹാദീപാരാധന നടക്കും.
ഗ്രഹണത്തിന്റെ ഭാഗമായുള്ള നട അടയ്ക്കല് കണക്കിലെടുത്ത് രാവിലെ അഞ്ച് മണി മുതലും തങ്ക അങ്കി ഘോഷയാത്ര നടക്കുന്നതിനാല് അന്നേ ദിവസം വൈകുന്നേരവും അയ്യപ്പ ദര്ശനത്തിന് എത്തുന്ന ഭക്തര്ക്ക് നിലക്കല്, പമ്പ എന്നിവിടങ്ങളില് നിയന്ത്രണം ഉണ്ടാകുമെന്ന് പൊലീസ് അറിയിച്ചു. രാത്രി 9.30ന് അത്താഴപൂജ 10.50ന് ഹരിവരാസനം പാടി 11 മണിക്ക് നട അടയ്ക്കും.
മണ്ഡലപൂജ ദിനമായ ഡിസംബര് 27ന് പുലര്ച്ചെ മൂന്ന് മണിക്ക് ആണ് ക്ഷേത്രനട തുറക്കുന്നത്. 3.15 മുതല് ഏഴ് മണി വരെ നെയ്യഭിഷേകം. 7.30ന് ഉഷപൂജ. എട്ട് മണി മുതല് 9.30 വരെ നെയ്യഭിഷേകം തുടരും. 10 മണിക്കും 11.40നും ഇടയ്ക്കുള്ള കുംഭം രാശിയില് തങ്ക അങ്കി ചാര്ത്തിയുള്ള മണ്ഡലപൂജ നടക്കും. ഉച്ചക്ക് ഒരുമണിക്ക് നട അടക്കും. അന്നേ ദിവസം വൈകുന്നേരം നാല് മണിക്ക് നട വീണ്ടും തുറക്കും. ദീപാരാധന വൈകുന്നേരം 6.30ന്. അത്താഴപൂജ 9.30ന്. രാത്രി 9.50ന് ഹരിവരാസനം പാടി പൊന്നമ്പലത്തിന് നട അടയ്ക്കും. ഇതോടെ 41 ദിവസം നീണ്ടുനില്ക്കുന്ന മണ്ഡലകാലത്തിനും പരിസമാപ്തിയാകും. മകരവിളക്ക് ഉത്സവത്തിനായി ക്ഷേത്രനട ഡിസംബര് 30ന് വൈകുന്നേരം അഞ്ച് മണിക്ക് തുറക്കും. 2020 ജനുവരി 15 നാണ് മകരവിളക്ക്.