വയനാട്: ജില്ലയില്‍ കോവിഡ് വ്യാപനവുമായി ബന്ധപ്പെട്ട എട്ട് സജ്ജീവ ക്ലസ്റ്ററുകളാണ് നിലവിലുള്ളത്. കല്‍പ്പറ്റ സിന്ദൂര്‍ ടെക്സ്റ്റയില്‍സ്, വനിതാ പൊലീസ് സ്റ്റേഷന്‍, പഞ്ചാബ് നാഷണല്‍ ബാങ്ക് എന്നിവ ജില്ലയിലെ പുതിയ സ്ഥാപന ക്ലസ്റ്ററുകളാണ്. സിന്ദൂര്‍ ടെക്‌സില്‍ ആകെ എട്ട് പേര്‍ക്കും വനിതാ പൊലീസ് സ്റ്റേഷന്‍, പഞ്ചാബ് ബാങ്ക് എന്നിവിടങ്ങളില്‍ ആറ് പേര്‍ക്ക് വീതവുമാണ് രോഗം സ്ഥിരീകരിച്ചത്.

പടിഞ്ഞാറത്തറ, മേപ്പാടിയിലെ ചൂരല്‍മല എന്നിവ ലാര്‍ജ് കമ്മ്യൂണിറ്റി ക്ലസ്റ്ററുകളും കല്‍പ്പറ്റയിലെ മുണ്ടേരി ക്ലോസ്ഡ് കമ്മ്യൂണിറ്റി ക്ലസ്റ്ററും ബത്തേരിയിലെ ബാംബു മെസ്, പൂതാടി പഞ്ചായത്ത് എന്നിവ ഇന്‍സ്റ്റിറ്റിയൂഷനല്‍ ക്ലസ്റ്ററുകളുമായി തുടരുന്നു. പടിഞ്ഞാറത്തറ ക്ലസ്റ്ററില്‍ 128 പേര്‍ക്കും മേപ്പാടിയില്‍ 77 പേര്‍ക്കും മുണ്ടേരിയില്‍ 43 പേര്‍ക്കും ബത്തേരി ബാംബു മെസ്സില്‍ 10 പേര്‍ക്കും പൂതാടി പഞ്ചായത്തുമായി ബന്ധപ്പെട്ട് 21 പേര്‍ക്കുമാണ് ഇതുവരെ കോവിഡ് സ്ഥിരീകരിച്ചത്. ജില്ലയിലെ സജ്ജീവ ക്ലസ്റ്ററുകളിലായി ആകെ രോഗം സ്ഥിരീകരിച്ചവര്‍ 299 പേരാണ്.

ജില്ലയിലെ അഞ്ച് ക്ലസ്റ്ററുകളില്‍ കോവിഡ് പൂര്‍ണ നിയന്ത്രണ വിധേയമായിട്ടുണ്ട്. ഏറ്റവും വലിയ ക്ലസ്റ്ററായിരുന്ന ഷീബാതൊടി- വാളാട് 347 പേര്‍ക്കും തൊണ്ടര്‍നാട് 26 പേര്‍ക്കും ബത്തേരി എം.ടി.സിയില്‍ 31 പേര്‍ക്കും മീനങ്ങാടിയില്‍ 76 പേര്‍ക്കും കല്‍പ്പറ്റ എസ്.പി ഓഫീസില്‍ നാല് പേര്‍ക്കുമാണ് രോഗം സ്ഥിരീകരിച്ചിരുന്നത്.